阿金道：“唔笃前头格情义，看是看见格，不过大先生终有点一相情愿勒海，阿晓得眼下格时世，靠勿住格人实在多，嘴里说得蛮蛮好，心里其实约约乎，况且格套戏子，愈加靠勿住，格落我勒里劝，去仔勒懊悔，懊悔是来不及格。大先生，格格稳瓶阿要捏哉。”宝玉不悦道：“管稳瓶打碎勿打碎，奴终决勿懊悔格，去仔好，是奴格命，去仔勿好，亦是奴格命，有啥要紧嗄？至于眼门前生意，可得可失，才勿勒奴心浪，下埭回转来，怕道呒不佬，要可惜煞哉？”阿金道：“大先生问仔我，格落我说格，我勒里想，间搭上海场化，顶顶闹猛，各处格人才有格，难信道除脱仔俚，一个才呒不好格，板要到京里去看俚，俚真真变仔活宝贝哉。”宝玉道：“勿实梗讲格，‘麻油拌青菜，各人心爱’，奴随便哪哼，一定要寻着仔俚，难末奴心死得来。”
阿金听了，晓得劝之无益，我何必再做戆人，徒然惹他动怒呢？即便改了口气道：“大先生要去末，倪阿敢拦当嗄？但是现在二月里，天还勿哪哼暖热，我看三月里动身末最好。大先生想阿对呢勿对佬？”宝玉点头称是。阿珠不甚明白，正想动问赴京之故，忽来了几位客人，当时暂将此事不言。晚上阿金方细细告诉阿珠，阿珠亦不以为是，然知宝玉去志已坚，也不便再劝了。这几十天，别无紧要书说。